ШҚО-дағы кеден бекеттерінде санитарлық-карантиндік посттар жұмыс істейді

Бейсенбі, 19 Наурыз 2020 10:33

Шығыс Қазақстанда коронавирустық инфекцияның алдын алу мақсатында тиісті жұмыстар атқарылуда. Бүгінде облыстағы санитарлық қызмет үш бағытта еңбек етуде. Бірінші бағыт бойынша шетелден келген азаматтарға арнайы мониторинг жасалып отыр. Екінші бағытқа сәйкес Бақты мен Майқапшағай кеден бекеттерінде санитарлық-карантиндік посттар жұмыс істеп жатыр. Бұл туралы аймақтық комуникациялар қызметінде өткен брифинг барысында тауарлар мен көрсетілетін қызметтер сапасын бақылау департаментінің басшысы Нұрланғазы Ибраев мәлім етті.

Брифингте басқарма басшысы коронавирустық инфекцияға қарсы дәрі-дәрмек қоры әзір тұрғанын атап өтті. Сондай-ақ стационарларда сақтық шараларын күшейту мақсатында инфекциялық төсектер дайын тұрғанын жеткізді.
– Шығыс Қазақстан облысында коронавирустық инфекцияға шалдыққан науқастар тіркелген жоқ. Осы мақсатта жауапты сала мамандары тиісті жұмыстарды атқарып жатыр, -деді Нұрланғазы Ибраев.
Елімізде жарияланған төтенше жағдайға байланысты облыстың бас санитар дәрігері аймақтағы барлық ауданда арнайы комиссия құрды. Бұдан бөлек өңір тұрғындарының жұмыс уақытына өзгерістер енгізілді. Брифингке қатысқан басқарма басшысы осылай деді.